फाइनलमा पुगेन तर पोर्चुगल १३ अंकसहित समुहमा दोस्रो भयो

एजेन्सी ।

साबिक विजेता पोर्चुगल युरोपियन नेशन्स लिग फुटबलको फाइनल्समा पुग्न सकेन तर उनले प्रभावशाली खेल भने पस्किएको छ ।

लिग अन्तर्गत मंगलबार राति भएको खेलमा पोर्चुगलले क्रोएसियालाई ३–२ ले पराजित गरेको छ । अवे मैदानमा भएको खेलमा क्रिष्टियानो रोनाल्डोसहितको समूह ए थ्रीको पोर्चुगलका लागि रुबेन डियाजले दुई तथा सेक्वेइराले एक गोल गरे ।

क्रोएसियाका लागि मातेओ कोभासिकले दुई गोल गरे । मार्को रोग ५१ औँ मिनेटमा दोहोरो पहेँलो कार्ड पाएर मैदानबाट बाहिरिएपछि क्रोएसिया १० खेलाडीमा सीमित भयो ।

कोभासिकले २९ औँ मिनेटमा गोल गरि घरेलु टोली क्रोएसियालाई सुरुवाति अग्रता दिलाए । ५२ औँ मिनेटमा डियाजले पोर्चुगलका लागि बराबरी गोल गरे । ६० औँ मिनेटमा सेक्वेइराले गोल गरेर अग्रता दिलाए ।

तर कोभासिकले ६५ औँ मिनेटमा व्यक्तिगत दोस्रो गोल गरि क्रोएसियालाई बराबरीमा ल्याए । तर डियाजले ९० औँ मिनेटमा गोल गरि पोर्चुगललाई जित दिलाए ।

जितपछि समूहको दोस्रो स्थानमा रहेको पोर्चुगलको १३ अंक भयो । यो समूहबाट १६ अंक जोडेको फ्रान्स फाइनलमा पुगेको छ । क्रोएसिया रेलिगेशनबाट जोगियो भने स्वीडेन रेलिगेशनमा परेको छ ।