दाङमा रोकी राखेको बसमा मोटरसाइकल ठोकिँदा एकको मृत्यु, १ घाइते

दाङ ।

दाङमा रोकी राखेको बसमा मोटरसाइकल ठोकिँदा १ जनाको मृत्यु भएको छ, भने १ जना घाइते भएका छन्। दुर्घटनाबाट बबई गाउँपालिका ६ कटकुइयाँ निवासी ४७ वर्षीय चित्रबहादुर डाँगीको मृत्यु भएको वडा नं ६ का वडाध्यक्ष रामबहादुर डाँगीले जानकारी दिए। साथै घाइते हुनेमा सोही ठाउँका मोटरसाइकलमा पछाडि सवार ४३ वर्षीय मानबहादुर केसी छन्। आज बुधबार बिहान करिब १० बजेतिर दुर्घटना भएको उनले बताए।

कटकुइयाँदेखि पंचकुलतर्फ आउँदै गरेको रा३प ४८६ नम्बरको मोटरसाइकल बबई ७ मठेउरीदेखि तुलसीपुरतर्फ जाँदै गरेको ना४ख ६३१० नम्बरको यात्रु राख्नका लागि कटकुइयाँमा रोकी राखेको बसको पछाडि ठोकिँदा दुर्घटना भएको इलाका प्रहरी कार्यालय खिलतपुरका प्रमुख मोहन विक्रम केसीले जानकारी दिए।

दुर्घटनामा परी गम्भीर घाइते भएका डाँगीलाई उपचारका लागि राप्ती प्रादेशिक अस्पताल तुलसीपुर लैजाँदै गर्दा बाटैमा मृत्यु भएको थियो। घाइते केसीलाई राप्ती प्रादेशिक अस्पतालमा सामान्य उपचारपछि थप उपचारका लागि बाँके रिफर गरिएको प्रहरीले जनाएको छ।