ट्रेलब्लेजर्सले जित्यो वुमन्स टि २० च्यालेन्ज उपाधि

एजेन्सी ।

भारतीय महिला क्रिकेट टोलीकी ओपनर स्मृती मन्धानाको कप्तानी प्रदर्शनसँगै ट्रेलब्लेजर्सले वुमन्स टि२० च्यालेन्ज २०२० को उपाधि जितेको छ ।

सोमबार राती सम्पन्न फाइनल खेलमा सुपरनोभाजलाई १६ रनले पराजित गर्दै ट्रेलब्लेजर्स च्याम्पियन बनेको हो । जितका लागि १ सय १९ रनको विजयी लक्ष्य पछ्याएको सुपरनोभाजले २० ओभरमा ७ विकेट गुमाउँदै १ रन २ बनायो । सुपरनोभाजकी कप्तानी हरमनप्रीत कौरले सर्वाधिक ३० रनको योगदान दिइन् ।

सलमान खातुनले १९ औं ओभरको दोस्रो बलमा बोल्ड आउट गर्नुअघि उनले ३६ बलमा २ चौका प्रहार गरिन् । ओपनर चामरी अथपाथु ६, जेमिमाह रोड्रिग्स १३, टानिया भाटिया १४ र शषिकाला श्रीवर्दने १९ रनमा आउट भइन् । ट्रेलब्लेजर्सकी स्पिनर सलमान खातुनले ४ ओभरमा १८ रन खर्चेर ३ विकेट लिइन् । दीप्ति शर्माले ३ ओभरमा ९ रन खर्चेर १ विकेट लिइन् ।

त्यसअघि शारजाह क्रिकेट स्टेडियममा टस हारेर ब्याटिङको निम्तो पाएको ट्रेलब्लेजर्सले निर्धारित २० ओभरमा ८ विकेटको क्षतिमा १ सय १८ रन बनाएको थियो । ट्रेलब्लेजर्सको लागि कप्तान तथा ओपनर स्मृती मन्धानाले ४९ बलमा ५ चौका र ३ छक्का सहित सर्वाधिक ६८ रनको योगदान दिईन् ।

अर्की ओपनर डिन्द्रा डोल्टिन २०, रिचा घोष १० र दीप्ति शर्मा ९ रनमा आउट भए । सुपरनोवासकी राधा यादवले ४ ओभरमा १६ रन खर्चेर ५ विकेट लिइन् । वुमन्स टि२० च्यालेन्जमा पाँच विकेट लिने उनी पहिलो खेलाडी हुन् । पुनम यादव र शषिकला श्रीवर्दनेले एक एक विकेट लिइन् ।

नोभेम्बर ४ देखि सुरु भएको वुमन्स टि२० च्यालेन्ज लिगमा तीन टोली सुपरनोभाज, भेलोसिटी र ट्रेलब्लेजर्सले प्रतिस्पर्धा गरेका थिए । जसमा अंक तालिका शीर्ष दुई टोली सुपरनोवास र ट्रेलब्लेजर्स फाइनल खेलेका हुन् । तीनै टोलीको २–२ अंक भएपनि नेट रनरेटको आधारमा भेलोसिटी पुछारमा रहेर बाहिरिनु परेको थियो ।