भवानी भिक्षु टोलमा स्थानीयबासीकै अगुवाईमा थालियो सरसफाई

मायादेवी अनलाइन, तौलिहवा ।
टोललाई स्वच्छ र हराभरा बनाउन कपिलवस्तुको तौलिहवाको भिक्षु टोलमा स्थानीयबासीको अगुवाईमा सरसफाई अभियान संचालन गरिएको छ । अभियानका लागि स्थानीय युवा मंगल आलेको अगुवाईमा समिति समेत निर्माण गरिएको छ ।

युवा र स्थानीयबासी गरी ५० जनाको सहभागीतामा भिक्षु चोकको पश्चिम तर्फ पर्ने घिमिरे टोलमा अभियान संचालन गरिएको थियो ।

टोलीले सडकमा रहेको प्लाष्टिक, गुटखाको पोका, सडकमा फालिएका फोहर संकलन गरेका थिए । कार्यक्रमका प्रमुख अथिति राप्रपाका जिल्ला अध्यक्ष नारायण बहादुर सिंह र पूर्व सभासद श्रीकान्ती पासीले शुभारम्भ गरेका थिए ।

सो अवसरमा अध्यक्ष सिंहले आफ्नो टोल बस्तीलाई स्वच्छ बनाउन स्थानीयबासी आफै अग्रसर हुन प्रशंसनीय काम भएको बताए । उनले नगरपालिकाको मुख ताक्नु भन्दा टोलबासी कै अग्रसरतामा सरसफाई अभियान संचालन गनू पर्ने बताए ।

सो अवसरमा संयोजक आलेले आफ्नो टोल बस्तीलाई स्वच्छ र हराभरा बनाउन आफुहरुले अभियान चलाएको बताए । अभियान हरेक हप्ताको शनिवार संचालन हुने उनले बताए । स्थानीय अगुवा शंकर घिमिरेले युवाहरुको अभियानमा आफुहरुको समेत साथ रहेको बताए ।