वनगाईका जुवा खालमा प्रहरीको छापा, लाख बढी रकमसहित १२ जुवाडे पक्राऊ

मायादेवी अनलाइन, चार नम्बर ।
कपिलवस्तुको बाणगंगा नगरपालिका वडा नम्बर ७ बनगाइका जुवा खालमा प्रहरीले छापा मारेको छ । चाडवाडको बेलामा लाखौँ रुपैयाँको जुवा खाल संचालन गरेको थाहा पाए पछि प्रहरीले मंगलबार राति त्यहाँ छापा मारेको हो ।

छापा मार्दा वनगाइको एक काष्ठ उद्योगमा जुवा खेलीरहेको अवस्थामा जुवाखालबाट १२ जनालाई नियन्त्रणमा लिएको प्रहरीले जनाएको छ । उनीहरुको साथबाट प्रहरीले १ लाख ७५ हजार ८ सय ५० रुपैयाँ नगद बरामद गरेको जनाइएको छ ।

यसबारे थप सोधपुछ भइरहेको पनि बताइएको छ । सोधपुछका आधारमा घटनाको प्रकृति हेरी आवश्यक कारबाही पनि गर्न सकिने र एक पटकको लागि अब गल्ती नगर्ने सर्तमा छुट दिन पनि सकिने प्रहरीले जनाएको छ । स्थानीयका अनुसार त्यहाँ लाखौँको कारोबार हुने गरी जुवा संचालन हुने गर्दछ ।

दशैँ तिहार लगायत चाडपर्व मान्ने निहुँमा बाणगंगाका बनगाई, चार नम्बर, गजेहडा, बोडगाउँ, ओदारी, पिपरा लगायतका स्थानमा जुवा खालहरु संचालन हुने गर्दछन् । जुन अवैध काम मानिन्छ । अन्य स्थानमा पनि छापा मारिने प्रहरीले जनाएको छ ।