टोटनह्यामको महत्वपूर्ण जित, बर्नली १-० ले पराजित

एजेन्सी ।

इंग्लिस प्रिमियर लिग फुटबल अन्तर्गत सोमबार राति भएको खेलमा टोटनह्याम विजयी भएको छ । लिग अन्तर्गत अवे मैदानमा भएको खेलमा टोटनह्यामले बर्नलीलाई १-० ले पराजित गरेको हो ।

टोटनह्यामको जितमा ह्यारी केन र सन हेङ्ग(मिनको भूमिका महत्वपूर्ण रह्यो । केनको सहयोगमा सनले ७६ औँ मिनेटमा गरेको गोल नै टोटनह्यामको जितका लागि निर्णायक बन्यो ।

एरिक लामेलाले पास गरेको बललाई केनले सन तर्फ दिएर गोलका लागि सहयोग गरेका हुन् । केन र सनले प्रिमियर लिगमा गोलका लागि गरेको यो २९ औँ साझेदारी हो ।

सनले यो सिजन लिगमा ८ गोल गरिसकेका छन् । जितपछि पाँचौँ स्थानको टोटनह्यामको ६ खेलबाट ११ अंक भएको छ ।सोमबार राति नै भएको खेलमा ब्राइटन र वेष्ट ब्रोमले १ १ को बराबरी खेली अंक बाँडेका छन् ।