भलिबलकी पुनमसहित ११ खेलाडी प्रहरी जवानमा बढुवा

काठमाडौं ।

राष्ट्रिय भलिबल टिमकी सदस्य पुनम चन्दसहित ११ जना खेलाडीले नेपाल प्रहरीको सिपाही (जवान) मा बढुवा पाएका छन् ।

विभागीय टिम नेपाल पुलिस क्लबको खेलकुद विभागमा रहेका ११ खेलाडीलाई प्रहरीले सिपाहीमा बढुवा गरेको हो ।

यस अघि कार्यालय सहयोगी र प्रकाशकमा रहेका ११ खेलाडीलाई प्रहरीले जवानमा बढुवा गरेको नेपाल पुलिस क्लबका पूर्व भलिबल खेलाडी तथा खेलकुद समितीका इन्चार्ज भरत शाहले खेलपाटीलाई जानकारी दिए ।

‘बुधबार ११ जनाले जवानमा नाम निकालेका छन् । उनीहरु कार्यलय सहयोगी र प्रकाशकमा रहँदै आएका थिए,’ राष्ट्रिय भलिबल टिमका पूर्व कप्तान समेत रहेका शाहले भने ।

बढुवा हुनेमा पुनमसँगै यू–१९ राष्ट्रिय फुटबल टिमकी स्ट्राइकर निर्मला उपाध्याय समेत रहेकी छिन् ।

पुनम नेपालमा आयोजना भएको १३ औं दक्षिण एसियाली खेलकुद सागमा नेपालले ऐतिहासिक रजत पदक जित्दा टिममा रहेकी थिइन् ।

यस्तै निर्मलाले राष्ट्रिय फुटबल टिमको प्रतिनिधित्व गर्दे साफ च्याम्पियनसिप र एएफसी यू–१९ फुटबल प्रतियोगितामा सहभागी जनाईसकेकी छिन् ।

फुटबल टिम तर्फबाट निर्मला मात्रै बढुवा भएकी हुन् । यस्तै महिला भलिबलतर्फबाट पुनमसँगै रिता बोहोरा बढुवा भएकी छिन् ।

यस्तै पुरुष भलिबल टिमबाट झमान सिंह दर्जी, सरोज चौलागाई र जलराज पाण्डे जवानमा बढुवा भएका छन् ।

त्यस्तै जुडोका सुदेश डोङ, करातेका लक्ष्मी आले, टेबल टेनिसका रेणु थापा मगर र भारोत्तोलनका बिशाल सिंह विष्ट जवानमा बढुवा भएका छन् ।