दार्चुलाको सीमाक्षेत्रमा अध्यागमन कार्यालय स्थापना हुन्छः गृहमन्त्री थापा

काठमाण्डौ ।

गृहमन्त्री रामबहादुर थापाले दार्चुलाको सीमाक्षेत्रलाई सरकारले विशेष प्राथमिकतामा राखेको बताउनुभएको छ ।

दार्चुलाको खलङ्गामा भएको कार्यक्रममा गृहमन्त्री थापाले दार्चुलाको उत्तरी सीमाक्षेत्र रणनीतिक महत्वको रहेको बताउँदै गृहमन्त्रीले विश्वका दुई ठूला देश चीन र भारतसँग सीमा जोडिएको यस क्षेत्रलाई सरकारले विशेष महत्व दिएको भन्नुभयो । उहाँले सीमाको रक्षा सरकारले मात्र गर्न नसक्ने र सीमाको सुरक्षा सीमा क्षेत्रका नागरिकले अझ राम्रोसँग गर्न सक्ने पनि बताउनुभयो ।

गृहमन्त्री थापाले सीमा क्षेत्रमा अध्यागमन स्थापनाको लागि छिट्टै आवश्यक निर्णय लिने र व्यासमा प्रभावकारी सञ्चार सुविधाका लागि थप टेलिफोन लाइन जडान गरिने बताउनुभयो । व्यासमा रहेको सीमा प्रशासन कार्यालयलाई छिट्टै सञ्चालनमा ल्याउन कर्मचारी पठाउने पनि बताउनुभयो ।