आश्विन चोटग्रस्त, अबको खेलमा सन्दिप दिल्लीबाट खेल्ने सम्भावना

एजेन्सी ।

इन्डियन प्रिमियर लिग (आइपिएल) मा नेपाली लेग स्पिनर सन्दीप लामिछानेले दिल्ली क्यापिटल्सबाट आगामी खेलमा प्लेइङ ११ मा मौका पाउने सम्भावना बढेको छ । दिल्लीले आइतबार राती सुपर ओभरमा किंग्स इलेभेन पञ्जाबलाई पराजित गर्दै विजयी सुरुवात गरेको छ । दिल्लीले पञ्जाबसँग खेल्नु अघिल्लो दिन अभ्यासको क्रममा तीव्र गतिका बलर ईशान्त शर्मा घाइते भएका थिए । पञ्जाबसँगको खेलमा स्पिनर रविचन्द्रन आश्विन पनि घाइते भएपछि सन्दीपको सम्भावना बढेको हो ।

आश्विनले छैटौं ओभरमा दिल्लीलाई दुई ठूला सफलता दिलाएका थिए । पहिलो बलमै करुण नायरलाई १ रनका क्याच आउट गराएका आश्विनले पाँचौ बलमा निकोलस पूरनलाई शून्यमा बोल्ड आउट गर्दै उत्कृष्ट सुरुवात दिलाएका थिए । तर अन्तिम बलमा म्याक्सवेलले प्रहार गरेको बल डाइभ हान्दै रोक्ने क्रममा उनको बायाँ हातको काँधमा चोट लागेको थियो ।

त्यसपछि आश्विन मैदानबाट बाहिरिएका थिए । खेलका दौरान आश्विनले आर्म स्लिङ ९काँधलाई आड दिने काम्रो० लगाएका देखिएका थिए । खेलपछि भने उनी स्लिङबिना नै हिडेको देखिएको थियो । दिल्लीका कप्तान श्रेयस ऐरले फिजियोसँगको कुराकानीपछि मात्रै आश्विन अर्को खेलमा उपलब्ध हुन सक्ने वा नसक्ने पुष्टि हुने बताएका छन् ।

आश्विन अर्को खेलमा उपलब्ध नभए सन्दीपले मौका पाउने बलियो सम्भावना छ । दिल्लीले पहिलो खेलमा चार विदेशी खेलाडीमा कागिसो रबाडा, एनरिच नोर्टजे, मार्कस स्टोइनिस र शिम्रन हेटमायरलाई मैदान उतारेको थियो । एनरिच नोर्टजे ४ ओभरमा ३३ रन खर्चिदा कुनै विकेट लिएका थिएनन् । आश्विन टोलीमा उपलब्ध नभए पहिलो खेलमा नोर्टजेको स्थानमा सन्दीपले मौका पाउने सम्भावना उच्च छ ।

इशान्त शर्मा चोटबाट फर्कनु र स्टोइनिसले राम्रो बलिङ गर्नुले पनि सन्दीपको सम्भावना बढेको छ । दिल्लीले शुक्रबार चेन्नई सुपर किंग्सविरुद्ध दुबईमा प्रतिस्पर्धा गर्ने छ । दिल्लीले बलिङ बलियो बनाउन सन्दीपलाई खेलाउने देखिन्छ । इशान्त घाइते भएपछि भारतले मोहित शर्मालाई मौका दिएको थियो । मोहितले ४ ओभरमा ४५ रन खर्चेर १ विकेट लिएका थिए ।

दिल्लीले दुई प्रमुख स्पिनरमा सन्दीप र अमित मिश्रा दुबैलाई मैदान उतार्न सक्छ । पञ्जाब र दिल्लीसँगको खेलमा दुबै टोलीका स्पिनरले उच्च प्रर्दशन गरेका थिए । आश्विनले १ ओभरमा २ रन खर्चेर २ विकेट लिएका थिए । अक्षर पटेलले ४ ओभरमा १४ रन खर्चेर १ विकेट लिएका थिए । पञ्जाब स्पिनर रबि बिश्रोईले ४ ओभरमा २२ रन खर्चेर १ विकेट लिएका थिए । पहिलो खेलमा सन्दीप र मिश्रा दुबै बेन्चमा बसेका थिए ।