प्रिमियर लिगः टोटनह्यामको शानदार जितमा मिनको मात्रै ४ गोल

एजेन्सी ।

जोसे मोरिन्होको टिम टोटनह्यामले इंग्लिस प्रिमियर लिगको नयाँ सिजनको दोस्रो खेलमा शानदार जित दर्ता गरेको छ ।

सिजनको पहिलो खेलमा पराजित भएको टोटनह्याम आइतबार राति भएको खेलमा भने साउथह्याम्पटनलाई ५–२ ले पराजित गर्न सफल भएको हो ।

अवे मैदानमा भएको खेलमा टोटनह्यामका लागि सन हेङ्ग–मिनले चार गोल गरे । ह्यारी केनले एक गोल थपे । साउथह्याम्पटनका लागि ड्याली इनग्सले दुई गोल गरेका हुन् ।

सनले पहिलो हाफको इन्जुरी समयको दोस्रो मिनेट, ४७ औँ, ६४ औँ तथा ७३ औँ मिनेटमा गोल गरेका हुन् । केनले ८२ औँ मिनेटमा गोल गरे ।

साउथह्याम्पटनका लागि ३२ औँ मिनेटमा गोल गरेका इनग्सले ९० औँ मिनेटमा पाएको पेनाल्टीमा व्यक्तिगत दोस्रो गोल गरे ।

लिग अन्तर्गत आइतबार राति भएको अर्को खेलमा ब्राइटनले न्यूक्यासल युनाइटेडलाई ३–० ले पराजित गरेको छ ।