उपाधि जित्ने मौकाबाट चुक्यो युभेन्टस

एजेन्सी ।
युभेन्टसले लिगका तीन खेल बाँकी हुँदै उपाधि जित्ने मौका गुमाएको छ । इटालियन सिरी ए फुटबल अन्तर्गत बिहीबार राति भएको खेलमा युडिनेससँग २-१ ले पराजत भएर युभेन्टस उपाधि जित्नबाट चुकेको हो ।

उसले अब लिगका बाँकी तीन मध्ये एक खेल जितेमा लगातार नवौँ पटक उपाधि पक्का गर्ने छ ।

बिहीबार राति घरेलु मैदानमा भएको खेलमा युडिनेसले युभेन्टसलाई पराजित गर्ने क्रममा दुवै गोल दोस्रो हाफमा गरेको हो ।

४२ औँ मिनेटमा माथेज डी लिग्टको गोलबाट लिएको अग्रता युभेन्टसले जोगाउन सकेन । युडिनेसका लागि ५२ औँ मिनेटमा नेस्तोरोभ्स्की तथा इन्जुरी समयको दोस्रो मिनेटमा फोफानाले गोल गरेका हुन् ।

पराजित भएको शीर्ष स्थानको युभेन्टसको ३५ खेलबाट ८३ अंक भएको छ । ३९ अंकसहित युडिनेस १५ औँ स्थानमा छ । यो खेलमा गोल गर्न नसकेका क्रिष्टियानो रोनाल्डोले अहिलेसम्म यो सिजन लिगमा ३० गोल गरेका छन् ।

बिहीबार राति नै भएको अर्को खेलमा लाजिओले काग्लिएरीलाई २-१ ले पराजित गरेको छ । ७२ अंकसहित लाजिओ चौथो स्थानमा छ ।