नेपालमा आठ जिल्ला ‘कोरोनामुक्त’

काठमाण्डौ ।
नेपालमा कोरोनामुक्त जिल्लाको सङ्ख्या आठ पुगेको छ । स्वास्थ्य तथा जनसङ्ख्या मन्त्रालयका अनुसार भोजपुर, पाँचथर, धनकुटा, रसुवा, मनाङ, मुस्ताङ, हुम्ला र जुम्लामा अहिले एक जना पनि सक्रिय सङ्क्रमित रहेका छैनन् । यी जिल्लामा एक पटक सङ्क्रमित भेटिए पनि अहिले सबै निको भएर डिस्चार्ज भएका छन् ।

मन्त्रालयका प्रवक्ता डाक्टर जागेश्वर गौतमकाअनुसार रौतहट, कैलाली र बाजुरामा पाँच सयभन्दा धेरैका दरले सक्रिय सङ्क्रमित रहेका छन् ।

पछिल्लो २४ घण्टामा थप ५८ जना कोरोना भाइरसको सङ्क्रमणबाट निको भएका छन् । आजसम्म ११ हजार ६ सय ९५ जना निको भएर डिस्चार्ज भएको र यो कुल सङ्क्रमितको ६६ दशमलव २४ प्रतिशत रहेको स्वास्थ्य मन्त्रालयले जनाएको छ ।