बेल र जिदानको दुरी, ला लिगाको अन्तिम खेलमा अटाएनन् बेल

एजेन्सी ।
स्पेनिस ला लिगा च्याम्पियन बनेको रियल मड्रिडले यो सिजन लिगको अन्तिम खेलमा आइतबार राति लेगानेससँग प्रतिस्पर्धा गर्दैछ । यो खेलका लागि घोषणा गरिएको टिममा प्रशिक्षक जिनेदिन जिदानले ग्यारेथ बेललाई राखेका छैनन् ।

२२ खेलाडीको टिममा बेल छुटाइएका हुन् । कोरोना भाइरसको महामारीपछि पुनः लिग सुरु भएयताका १० खेल मध्ये बेलले मात्रै दुई खेलमा खेल्न पाएका छन् ।बिहीबार राति रियल मड्रिडलाई ३४ औँ पटक ला लिगाको उपाधि दिलाउने भिल्लारियल विरुद्धको २–१ को जितको क्रममा बेललाई जिदानले थप खेलाडीका रुपमा राखेका थिए, तर उनलाई प्रयोग गरेनन् ।

जिदानले इडन हजार्डलाई पनि अन्तिम खेलको टिममा राखेका छैनन् ।रियल मड्रिडले उपाधि जितेका दिन ३१ वर्ष पूरा गरेका बेल केही खेलाडीले प्रशिक्षक जिदानलाई उचालिरहेका बेला बेल केही पर उभिएको देखिएको थियो । जिदान र बेलबिचको सम्बन्ध राम्रो छैन ।

जिदानले बेललाई प्रयोग गर्न नचाहेको स्पष्ट देखिन्छ । बेलले यो सिजन अहिलेसम्म ला लिगाका १६ खेलमा सहभागिता जनाएका छन् । मात्रै १२ खेलमा उनले सुरुदेखि खेल्ने मौका पाएका थिए ।