अर्घाखाँचीको ठाडामा जिप दुर्घटना, एक जनाको मृत्यु

बिष्णु कुमार आले, अर्घाखाँची ।
गोरूसिङ्गे–सन्धिखर्क सडकखण्डको ठाडा दह नजिकै रिपाहपाखामा शनिबार साँझ स्कारपियो दुर्घटना हुँदा १ जनाको मृत्यु भएको छ ।

दुर्घटनामा परि अन्य एक जना गम्भीर घाईते भएका छन् । बुटवलबाट सन्धिखर्क जाँदै गरेको बा १५ च २७०६ नम्बरको स्कारपियो दुर्घटना हुँदा नाम ठेगाना नखुलेका अन्दाजी २५ र ३० बर्ष जस्तो देखिने एक जना युवकको मृत्यु भएको प्रहरीले जनाएको छ ।

दुर्घटनामा परि घाईते भएका युवकको उपचार गर्न ठाडा प्राथमिक स्वास्थ्य केन्द्रमा लैजादै गर्दा बाटोमै मृत्यु भएको हो ।

गाडी चालक लिला तामाङ गम्भीर घाईते भएका छन् । घाईते तामाङको प्राथमिक स्वास्थ्य केन्द्र ठाडामा उपचार भैरहेको छ ।

गाडी सडकबाट करिव ६ सय मिटर तल खोलामा खसेर दुर्घटना ग्रस्त भएको छ । घटनाको थप बिवरण आउन बाँकि छ ।