नारायणी नदी किनारमा शव भेटियो

नवलपरासी ।
नारायणी नदी किनारमा एक पुरुषको शव फेला परेको छ । नवलपरासी (बर्दघाट–सुस्तापूर्व) को गैँडाकोट नगरपालिका वडानम्बर ६ का ५९ वर्षीय कृष्णप्रसाद चालिसेको नदी किनारमा शव भेटिएको हो ।

गैँडाकोट–७ स्थित नारायणी नदी किनारमा चालिसेलाई मृतावस्थामा भेटिएको इलाका प्रहरी कार्यालय गैँडाकोटले जनाएको छ । असार ३० गते मंगलबार दिउँसो घरबाट निस्किएका चालिसे बुधबार साँझ मृतावस्थामा भेटिएका इलाका प्रहरी कार्यालय गैँडाकोटका प्रमुख चन्द्रबहादुर थापाले बताउनुभयो । मंगलबार साँझसम्म चालिसेलाई स्थानीयवासीले घुम्दै गरेको अवस्थामा देखेको भए पनि उनको मृत्यु के कारणले भएको हो ? भन्नेबारे प्रहरीले अनुसन्धान गरिरहेको थापाले जानकारी दिनुभयो ।

चालिसेको शवलाई परीक्षणका लागि चितवनको भरतपुर अस्पतालमा पठाइएको छ । परीक्षण रिपोर्ट आउन बाँकी रहेको बताइएको छ । चालिसेको मृत्यु शंकास्पद देखिएकाले आफूहरुले थप अनुसन्धान अघि बढाएको थापाले बताउनुभयो ।