चम्किए मार्टिअल, युनाइटेडको सहज जित

एजेन्सी ।
एन्थोनी मार्टिअल चम्कदा म्यान्चेस्टर युनाइटेडले इंग्लिस प्रिमियर लिग फुटबलमा सहज जित निकालेको छ । घरेलु मैदानमा बुधबार राति भएको खेलमा युनाइटेडले सेफिल्ड युनाइटेडमाथी ३-० को सहज जित निकालेको हो ।

घरेलु टोलिलाई जित दिलाउन एन्थोनी मार्टिअलले ह्याट्रिक गोल गरे । मार्टिअलले दुई गोल पहिलो हाफमा गरेका थिए । खेल सुरु भएको सातौ मिनेटमा नै मार्टिअलले गोल गर्दै घरेलु टोलिलाई अग्रता दिलाए । उनले मार्कुस रास्फोर्डको पासमा गोल गरेका हुन् ।

त्यस्तै पहिलो हाफ सकिन एक मिनेट बाँकी रहँदा मार्टिअलले व्यक्तिगत दोस्रो गोल गर्दै युनाइटेडको अग्रता दोब्बर पारे । आरोन वान बिसाकाको पासमा गोल गर्दै उनले पहिलो हाफमा २-० को अग्रता दिलाएका हुन् ।

त्यस्तै खेलको ७४ औं मिनेटमा मार्टिअलले ह्याट्रिक पूरा गरे । उनले रास्फोर्डको पासमा गोल गर्दै ह्याट्रिक पूरा गरेका थिए । यससँगै युनाइटेडले सेफिल्डमाथी ३(० गोलको जित निकालेको हो ।

यस जितसँगै युनाइटेडले ३१ खेलबाट ४९ अंक जोड्दै तालिकाको पाँचौं स्थानमा यथावत छ । यता पराजित सेफिल्ड युनाइटेड भने समान खेलबाट ४४ अंकसहित आठौं स्थानमा छ ।

बुधबार राति नै भएको अर्को खेलमा एभर्टनले नर्विच सिटीलाई पराजित गरेको छ । नर्विच सिटीको घरेलु मैदानमा भएको खेलम एभर्टनले १-० को जित निकालेको हो ।

त्यस्तै अर्को खेलमा वेल्भसले बर्नमाउथलाई पराजित गरेको छ । वेल्भसको घरेलु मैदानमा बर्नमाउथ १-० गोले पराजित भएको हो । यस जितसँगै वेल्भस छैटौं स्थानमा यथावत छ ।

अर्को खेलमा न्युक्यासल र एस्टन भिल्लाले बराबरी खेलेका छन् । दुबै टोलिले १(१ को बराबरी खेलेका हुन् ।