केन नायक बनेको खेलमा टोटेनहमको जित

एजेन्सी ।

ह्यारी केनले विजयी गोल गरेको खेलमा टोटेनहमले प्रियिमर लिग फुटबलमा जित निकालेको छ ।सोमबार राति घरेलु मैदानमा टोटेनहमले वेस्ट ह्याम युनाईटेडमाथि २–० को जित निकालेको हो ।

खेलमा अग्रता टोटेनहमले टोमस सोसेकको आत्मघाति गोलमार्फत ६४ औं मिनेटमा लिएको थियो । खेल सकिन ८ मिनेट बाँकी छदाँ केनले गोल गर्दै घरेलु टोलीको जित सुनिश्चित गरेका थिए । केनले यस सिजन टोटेनहमबाट १८ औं गोल पुरा गरे ।

पछिल्ला ८ खेलमा टोटेनहमले पहिलो जित दर्ता गरेको छ । टोटेनहमको जितले वेस्ट ह्यामलाई भने रेलिगेशनको दबाब थपिएको छ ।

रेलिगेशन जोन भन्दा मात्र एक स्थान माथि रहेको वेस्ट ह्यामलाई दुरी बढाउने राम्रो अवसर प्राप्त थियो । तर रेलिगेशन जोनमा रहेका तीनै टोलीले वेस्ट ह्याम भन्दा एक खेल कम खेलेका छन् ।पछिल्लो जितले टोटेनहमलाई राहत दिएको छ । क्लब च्याम्पियन्स लिगको दौडमा चौथो स्थानको चेल्सी भन्दा मात्र ६ अंकले पछाडी छ ।

शीर्ष चारको दौडमा रहेको टोटेनहमलाई च्याम्पियन्स लिगमा छनोट हुन कठिन मानिएको छ । तर प्रशिक्षक जोसे मौरिन्हो भने आफ्नो टोली शीर्ष चारमा उक्लिनेमा आशावादी छन् ।सातौं स्थानको टोटेनहमको ४५ अंक रहेको छ । वेस्ट ह्याम २७ अंक सहित रेलिगेशन जोन भन्दा एक स्थानमाथि छ ।