बार्सिलोनाका लागि खेल्नु उत्तम

एजेन्सी ।
अर्जेन्टिनी स्ट्राइकर पाउलो डिबालाले स्पेनिस क्लब बार्सिलोनाका लागि खेल्नु उत्तम भएको बताएका छन् । उनले बार्सिलोना ठूलो टोली भएको र मेस्सीसँग खेल्न अझै उत्कृष्ट हुने बताए ।

२६ वर्षीय डिबालाले युभेन्टसमा आफ्नो बसाइँ लम्ब्याउने तयारी गरेका छन् । जहाँ उनी २०२२ सम्म करारमा रहनेछन् । तर डिबालाले बार्सिलोनामा आफ्ना अन्तर्राष्ट्रिय टिमका सहकर्मी मेस्सीसँग पुनर्मिलन गर्नु उत्कृष्ट हुने बताए ।

“सत्य यो हो कि बार्सिलोना विश्वव्यापी रूपमा ठूलो टोली हो । त्यहाँ मेस्सीको साथ अझ ठूलो छ,” डिबालाले भने, “बार्सिलोनामा खेल्नु धेरै राम्रो हुनेछ । तर युभेन्टस पनि एक अविश्वसनीय क्लब हो । धेरै ठूलो इतिहासले भरिएको छ । जहाँ हाल उत्कृष्ट खेलाडीहरू पनि छन् ।”

डिबालाले बार्सिलोना सर्ने विषय सोच्नु चासोको विषय हुनसक्ने बताए । तर, उनी युभेन्टसमा सम्झौता विस्तारको नजिक पुगि सकेको रिपोर्टमा उल्लेख छ । “म युभेन्टसको खेलाडी हुँ र यहाँ खुसी छु । मानिसहरू मलाई धेरै माया गर्छन् र उनीहरुलाई म पनि धेरै माया गर्छु । क्लब र यहाँका समर्थकहरूसँग मेरो ठूलो सराहना छ,” उनले भने ।