किन पक्राउ परे तीव्र गतिका बलर मदुसं ?

एजेन्सी ।
श्रीलंकाका तीव्र गतिका बलर सेहान मदुसंका पक्राउ परेका छन् । उनी आइतबार श्रीलंकाको पन्नालामा ड्रग्स केसमा पक्राउ परेका थिए । मदुसंकालाई सोमबार हिरासतमा दिइएको छ ।

२५ वर्षीय तीव्र गतिका बलर मदुसंकालाई देशमा लागु गरिएको लकडाउनको उलङ्घन गर्दै कार चलाइरहेका बेला पुलिसले रोकेको थियो । सोही समय उनलाई दुई ग्राम ड्रग्ससहित पक्राउ गरेको पुलिसले जनाएको छ । कारमा उनीसँग एक अर्को व्यक्ति पनि रहेको जनाइएको छ ।

मदुसंकालाई दुई साताका लागि हिरासतमा लिइएको रिपोर्टमा उल्लेख गरिएको छ । २० मार्चदेखि श्रीलंकामा जारी लकडाउन उलङ्घन गर्ने ६५ हजारभन्दा बढी व्यक्तिलाई श्रीलंकन पुलिसले पक्राउ गरेको छ ।

मदुसंकाले २७ जनवरी २०१८ मा ढाकामा बंगलादेशविरुद्ध खेल्दै एकदिवसीय अन्तर्राष्ट्रियमा डेब्यु गरेका थिए । डेब्यु खेलमा नै उत्कृष्ट प्रदर्शन गर्दै उनले ह्याट्रिक लिएका थिए । उक्त खेल श्रीलंका ७९ रनले विजयी भएको थियो ।