कपिलवस्तुको मायादेवीमा भेटिएका चारै जना कोरोना संक्रमित भारतबाट आएका थिए

मायादेवी अनलाइन, चारनम्बर ।
कपिलवस्तुमा मंगलबार थप ४ जनामा कोरोनाभाइरस देखिएको छ । जिल्लाको दक्षिणी सिमावर्ती मायादेवी गाउँपालिकामा थप चार जनामा मंगलबार विहान पुष्टि भएको हो ।

स्वास्थ्य कार्यालय कपिलवस्तुले मंगलबार विहान उपलब्ध गराएको तथ्याङ्क अनुसार मायादेवी गाउँपालिका वडा नं. ४ का बर्ष ४०, ४२, ४५ बर्षीय पुरुष र वडा नं. ३ का २० बर्षीय पुरुष रहेका छन् ।

मायादेवी गाउँपालिकाका उनीहरू भारतबाट आएको प्रमुख जिल्ला अधिकारी दीर्घनारायण पौडेलले जानकारी दिनुभयो ।

भारतबाट आएपछि उनीहरूलाई गाउँपलिकाको छत्रपाली क्वारेन्टिनमा राखिएको थियो । उनीहरूलाई बुटवल वा दाङको अस्पतालमा लैजाने तयारी गरिएको छ।

योसँगै कपिलवस्तुमा संक्रमितको संख्या ४७ पुगेको छ । यता नेपालमा कोरोना संक्रमितको संख्या ३ सय ७९ पुगेको छ। सोमबार मात्र एकैदिन ८० जनामा संक्रमण देखिएको थियो । नेपालमा अहिलेसम्म कोरोनाबाट दुई जनाको मृत्यु भएको छ भने ३७ जना निको भएका छन्।