डर्टमन्डको जितमा हालान्डको गोल

एजेन्सी ।
शनिबार राति भएको जर्मन बुन्डेसलिगामा बोरुसिया डर्टमन्ड विजयी भएको छ । घरेलु मैदानमा भएको खेलमा डर्टमन्डले साल्केलाई ४–० गोलले पराजित गरेको हो ।

डर्टमन्डको जितका लागि राफेल गुरेरोले दुई तथा एर्लीङ हालान्ड र थोर्गन हाजार्डले एक–एक गोल गरे । पहिलो हाफमा २–० को अग्रता बनाएको डर्टमन्डले दोस्रो हाफमा थप दुई गोल गरेको थियो । खेलको २९ औं मिनेटमा हालान्डले गोल गर्दै घरेलु टोलीलाई अग्रता दिलाएका थिए । पहिलो हाफको अन्तिम मिनेटमा गुरेरोले गोल गर्दै डर्टमन्डको अग्रता दोब्बर पारे ।

दोस्रो हाफ सुरु भएको तीन मिनेट नबित्दै हाजार्डले गोल गर्दै डर्टमन्डको अग्रता तेब्बर पार्‍यो । उनले ४८ औं मिनेटमा जुलिएनको पासमा हानेको शसक्त प्रहारले गोल पोस्टको जाली चुमेको थियो । त्यस्तै ६३ औं मिनेटमा हालान्डको पासमा गुरेरोले व्यक्तिगत दोस्रो गोल गर्दै डर्टमन्डलाई ४–० फराकिलो जित दिलाए ।

यो खेल जितेसँगै डर्टमन्डले शीर्षस्थानको बायर्न म्युनिखसँग एक अंकको दुरी घटाएको छ । एक खेल कम खेलेको बार्यनको २५ खेलबाट ५५ अंकसहित शीर्ष स्थानमा छ ।