कपिलवस्तुमा फेरी ६ जनामा देखियो कोरोना, जिल्लामा संक्रमितको संख्या पुग्यो २१

मायादेवी अनलाइन, चारनम्बर ।
कपिलवस्तुमा फेरी ६ जना कोरोना संक्रमित थपिएका छन् । सोमबार साँझमात्र फेरी ६ जनामा कोरोना संक्रमण पाइएको हो ।

स्वास्थ्य तथा जनसंख्या मन्त्रालयले दिएको जानकारी अनुसार कपिलवस्तुमा ६ जनासंगै रुपन्देहीमा ६ र बर्दियामा १ जनामा कोरोना संक्रमण पुष्टि भएको हो ।

उनीहरुको राष्ट्रिय जनस्वास्थ्य प्रयोगशालामा गरिएको परीक्षणमा कोरोना संक्रमण पुष्टि भएको मन्त्रालयका सहप्रवक्ता डा. समीरकुमार अधिकारीले जानकारी दिए ।

सोमबार विहानमात्रै कपिलवस्तुमा १० जनामा कोरोना संक्रमण पुष्टि भएको थियो । कपिलवस्तुमा मात्र सोमबार १६ जनामा कोरोना संक्रमण देखिएको छ । रुपन्देहीमा यसअघि एक जनामा संक्रमित देखिएकामा सोमबार ६ जना थपिएको हो ।

बर्दियामा भने पहिलो पटक कोरोना संक्रमण देखिएको हो । यो संगै कपिलवस्तुमा कोरोना संक्रमितको संख्या २१ पुगेको छ । गत विहीबार दुई र शनिबार तीन जनाका कोरोना देखिएको थियो ।