नेपालगञ्जको निषेधित क्षेत्रमा तनाव, प्रहरीको गाडी तोडफोड

काठमाडौं ।
कोरोना भाइरस फैलिन नदिन घोषणा गरिएको नेपालगञ्‍जस्थित निषेधित झडप भएको छ। नेपालगञ्‍ज उपमहानगरपालिकामा प्रहरी र स्थानीय व्यापारीबीच मंगलबार बिहान झडप भएको हो ।

झडपका क्रममा वडा प्रहरी कार्यालय नेपालगञ्जको गाडी तोडफोड गरिएको छ । बजार बन्द गराउने क्रममा स्थानीय व्यापारीको समूहले प्रहरीको गाडीमा तोडफोड गर्दा गाडीको अगाडिको सिसा फुटेको प्रहरीले जनाएको छ। निषेधाज्ञा कार्यान्वयन गराउने क्रममा सडकमा यात्रुलाई तितरवितर गर्न त्रिवेणी मोडमा खाद्यान्‍न पसल गर्दै आएका रवि गुप्ताले पसल खोल्न पाउनुपर्ने भन्दै एक्कासि प्रहरीमाथि हातपात गरेका थिए ।

प्रहरीले उनीमाथि सामान्य बल प्रयोग गरेर नियन्त्रणमा लिएको बाँकेका प्रहरी नायव उपरीक्षक शिवबहादुर सिंहले जानकारी दिए। बजार बन्द गराउनेक्रममा प्रहरीमाथि हातपात गर्ने व्यापारी गुप्तालाई नियन्त्रणमा लिएर घटनाका बारेमा सोधपुछ गरिएको प्रहरी प्रवक्ता सिंहले बताए । स्थानीय प्रशासनले उपमहानगरपालिका क्षेत्रलाई मंगलबार बिहान ११ बजेदेखि यही वैशाख २५ गते मध्यरातसम्म (तीन दिन)का लागि पूर्णरुपले निषेधित क्षेत्र घोषणा गरिसकेको छ।