केनले मेरो रेकर्ड तोड्न सक्छन्ः रोनी

एजेन्सी ।
पछिल्लो समय इङ्ल्यान्ड फुटबलमा चर्चा कमाउन सफल खेलाडी हुन् ह्यारी केन । उनले लामो समय प्रिमियर लिग फुटबलमा चर्चा बटुलेका छन् । साथै इङ्ल्यान्ड राष्ट्रिय फुटबल टोलीका लागि पनि उनले उत्कृष्ट खेल प्रदर्शन गरिरहेका छन् ।

इङ्ल्यान्ड राष्ट्रिय फुटबल टोलीका पूर्वलिजेन्डरी फुटबल खेलाडी वायन रोनीले आफूले राष्ट्रिय टोलीमा रहँदा बनाएका रेकर्डहरु केनले तोड्ने कुरामा विश्वस्त भएको बताएका छन् । रोनीले राष्ट्रिय टोलीका लागि १२० खेल खेल्दै ५३ गोल पनि गरेका छन् ।

“वास्तवमा मैले भन्नु पर्दा तपाईंहरूलाई अचम्म लाग्न सक्छ । म प्राकिृतिक गोल स्कोरर होइन । मैले म्यान्चेस्टर युनाइटेड र इङ्ल्यान्ड राष्ट्रिय टोलीका लागि रेकर्ड बनाएको छु । मलाई त्यो कुरामा खुसी पनि लाग्छ । अब मेरो रेकर्ड केनले तोड्नेछन्,” रोनीले भने ।

केनले हाल राष्ट्रिय टोलीका लागि ४५ खेल खेलेर ३२ गोल गरेका छन् । प्रिमियर लिगमा १९८ खेलमा १३६ गोल गरेका छन् ।