कतार एयरबाट आएका बाणगंगाका माधव पौडेलसहित ४ जनाकै कोरोना रिपोर्ट नेगेटिभ

मायादेवी अनलाइन, चारनम्बर ।
गत चैत्र ४ गते कतार एयरवेजबाट आएका कपिलवस्तुका माधव पौडेलको नतिजा नेगेटिभ देखिएको छ । कतारबाट आई सम्पर्कविहिन भई १४ दिने होम क्वारेनटाइन बसेर हिजो मात्र नगरको सम्पर्कमा आएका बाणगंगा ९ निवासी पौडेलको आज द्रुत परीक्षण गर्दा रिपोर्ट नेगेटिभ देखिएको हो । उनीहरुको सिद्धार्थ क्याम्पसमा रहेको परीक्षण कक्षमा जाँच गरिएको थियो । नगरपालिकाका स्वास्थ्य शाखा प्रमुख ठगराज पौडेलका अनुसार पौडेलसहित कतार एयरवेजबाट आएका अन्य २ र साउदीबाट आएका एक जना गरी ४ जनाको रिपोर्ट नेगेटिभ आएको हो । उनीहरुलाई अब एक दुई दिनमा प्रकृया पुरेयाएर डिस्चार्ज गरिने छ । खोजी जारी रहेकै बेला उनी विहिबार २९ दिनपछि सम्पर्कमा आएका थिए । उनले आफू १४ दिन क्वारेनटाइनमा बसेको पनि बताएका थिए । अन्य ३ जनाको नाम भने खुलाइएको छैन । अन्य ३ जनामध्ये २ जना वडा नम्बर ९ कै हुन् भने १ जना वडा नम्बर ७ का रहेको पौडेलले जानकारी दिनुभयो । उनीहरुको कोरोना रिपोर्ट नेगेटिभ देखिएपछि नगरमा रहेको त्रास पनि मेटिएको छ ।