कोरोना महामारीः अमेरिकाको न्यु योर्कमा मात्रै एकैदिन ७ सय ७९ जनाको मृत्यु

एजेन्सी ।
कोरोना भाइरसको महामारी अमेरिकामा केही दिनदेखि स्थिर तर माथिल्लो तहमा कायम रहेको ठानिएको छ।तर महामारीको हटस्पट न्यूयोर्कमा भने कोरोना भाइरसबाट संक्रमति भएर मृत्यु हुनेको संख्या लगातार नयाँ उचाईमा पुगिरहेको छ । बुधबार एकै दिन ७७९ जनाको मृत्यु भएको छ ।

महामारी फैलिए यता न्यूयोर्कमा भाइरसका कारण एकै दिन संक्रमितको मृत्यु भएको यो अहिलेसम्मकै उच्च हो । मंगलबार न्यूयोर्कमा कोभिड–१९ बाट ७३१ जनाको मृत्यु भएको थियो ।यस्तै न्यू जर्सीमा पनि बुधबार अहिलेसम्मकै धेरै व्यक्तिको मृत्यु भएको छ । न्यू जर्सीमा बुधबार २७५ जनाको मृत्यु भएको छ । मंगलबार राज्यमा २३२ जनाको मृत्यु भएको थियो ।

दुई राज्यमा गरेर अमेरिकामा कोरोना भाइरसका कारण मृत्यु भएका कुल मानिस मध्ये आधार भन्दा बढी छन् । न्यूयोर्क र न्यू जर्सीमा गरेर सात हजार ७७२ जनाको मृत्यु भएको छ । न्यूयोर्कमा ६ हजार २६८ तथा न्यू जर्सीमा एक हजार ५०४ जनाको मृत्यु भएको छ ।अमेरिकामा अहिलेसम्म कोभिड–१९ बाट १४ हजार ७६६ जनाको मृत्यु भएको छ । अहिलेसम्म कुल संक्रमितको संख्या अमेरिकामा चार लाख ३० हजार ९०२ पुगेको छ । न्यूयोर्कमा संक्रमितको संख्या एक लाख ५१ हजार १७१ रहेको छ । न्यू जर्सीमा संक्रमितको संख्या ४७ हजार ४३७ पुगेको छ ।