कोरोना भाइरसः सङ्क्रमितको संख्या विश्वभर १३ लाखभन्दा बढी

काठमाडौं ।
विश्वव्यापी रुपमा फैलिएको कोरोना भाइरस (काभिड-१९) का कारण १३ लाखभन्दा धेरै सङ्क्रमित भएका छन् ।
विश्वका दुई सय ९ देश र दुई वटा अन्तर्राष्ट्रिय पानी जहाजमा फैलिएको कोरोनाका कारण १३ लाख ४४ हजार आठ सय ५९ जनामा सङ्क्रमण पुष्टि भएको छ ।
सङ्क्रमितमध्ये दुई लाख ७८ हजार तीन सय ३० जना उपचारपछि निको भएका छन् । ९ लाख ९१ हजार आठ सय ९४ जनाको उपचार भइरहेको छ । ७४ हजार ६ सय ३५ जनाको ज्यान गएको छ ।
गएको २४ घण्टामा अमेरिकामा मात्रै एक हजारभन्दा धेरैको ज्यान गएको छ । योसँगै अमेरिकामा भाइरसको सङ्क्रमणबाट ज्यान गुमाउनेको सङ्ख्या १० हजारभन्दा धेरै भएको छ । साढे तीन लाखभन्दा धेरैमा सङ्क्रमण पुष्टि भएको छ ।
यस्तै इटलीमा साढे १६ हजारभन्दा धेरै, स्पेनमा १३ हजारभन्दा धेरै, फ्रान्समा झण्डै ९ हजार जनाको ज्यान गइसकेको छ । गएको २४ घण्टामा विश्वका विभिन्न देशमा पाँच हजार दुई सय ९ जनाको ज्यान गएको छ भने ७१ हजार ९ सय ५८ जना नयाँ सङ्क्रमित थपिएका छन् ।