आइसोलेसनमा राखिएका एक युवकको मृत्यु, नमूना परीक्षणको रिपोर्ट आउन बाँकी

काठमाडौँ ।
चितवनको भरतपुरस्थित कोरोना विशेष अस्पतालमा उपचाररत एक युवकको मृत्यु भएको छ । वीरगञ्जका ३० वर्षीय ती युवकको मंगलबार बिहान मृत्यु भएको हो ।

उच्च ज्वरो आएपछि उनलाई कोरोना भाइरसको स‌क्रमणको आशंकामा कोरोना विशेष अस्पतालमा भर्ना गरिएको थियो । उनलाई कोरोनाको संक्रमण भए नभएको भने पुष्टि भएको छैन ।

चितवनका सहायक प्रमुख जिल्ला अधिकारी नेत्रप्रसाद शर्माले मृत्यु भएका युवकमा कोरोना संक्रमण भए नभएको रिपोर्ट प्राप्त भइनसकेको बताए । ‘व्यक्तिको मृत्यु भएको पक्कै हो, फरक किसिमले पनि हुन सक्छ, कोरोना भए नभएको पुष्टि भएको छैन’, उनले भने, ‘रिपोर्ट आउन बाँकी छ, अहिले नै भन्न सक्ने अवस्था छैन ।’