दाङ ।
भारतबाट नेपालगञ्ज हुँदै दाङको तुलसीपुर आउन लागेका २६ जना भारतिय नागरिकलाई फिर्ता पठाइएको छ ।
कोरोना भाइरसको जाँचका लागी स्थापना गरिएको हेल्थ डेस्क तुलसीपुर १३ दमारगाउँबाट उनीहरुलाई फिर्ता पठाईएको हो । शनिवार नेपालगन्जबाट तुलसीपुर तर्फ आउदै गरेको बसमा सवार उनीहरुलाई सोधपुछ गर्दा भारत हुँदै नेपाल आएको खुलेपछि फिर्ता पठाइएको हो ।
उनीहरुले बिजौरीका विभिन्न ईट्टाभट्टामा काम गर्न तुलसीपुर आएको बताएका छन् । तर उनीहरुले आफूहरुको घर नेपालगञ्ज भने पनि स्थायी ठेगाना खुलेको छैन ।
उनीहरु शनिबार भारतको नानपारादेखि नेपाल आएको खुलेको हो । हेल्थ डेस्कमा जाँच तथा सोधपुछ गर्ने क्रममा उनीहरुलाई फिर्ता पठाईएको तुलसीपुर उपमहानगरपालिका जनस्वास्थ्य प्रर्वद्धनका जनस्वास्थ्य निरीक्षक विमल केसीले जानकारी दिएका छन् । कोरोना भाइरसको जोखिमलाई मध्यनजर गर्दै भर्खरै भारतदेखि आएको हुँदा उनीहरुलाई फिर्ता पठाइएको हो ।
कोरोना भाइरस रोकथाम तथा उच्च सतर्कताका लागी तुलसीपुर उपमहानगरपालिकाले दुई स्थानमा हेल्थ डेस्क स्थापना गरी जाँच गर्न सुरु गरेको छ । विशेषगरी भारतको नाकासँग जोडिएको जिल्ला भएकाले नेपालगञ्जदेखि तुलसीपुर आउने यात्रुहरुका लागी दमारगाउँ र हवाई यात्रा प्रयोग गर्नेहरुलाई लक्षित गदै टरिगाउँ एयरपोर्टमा हेल्थ डेस्क स्थापना गरिएको छ ।
भारतमा समेत कोरोनाको संक्रमण देखीएको हुँदा उनीहरुलाई हाल तुलसीपुर आउन रोक लगाइएको हो । हालसम्म दुई वटा हेल्थ डेस्कमा गरी झन्डै ११ हजार बढी नागरिकमा जाँच गरिएको छ । तर हालसम्म पनि कसैमा कोरोना भाइरसको संक्रमण फेला नपरेको जनस्वास्थ्य निरीक्षक केसीले जानकारी दिएका छन् । शनिबार मात्रै एक हजारभन्दा बढीलाई जाँच गरिएको थियो ।
प्रतिक्रिया