वाणगंगाको सिद्धिपुर क्षेत्रमा फेरी विद्युत अवरुद्ध, रेडियो मायादेवीसहितका सेवाग्राही मर्कामा

मायादेवी अनलाइन, चारनम्बर ।
पटक-पटक विद्युत सेवा अवरुद्ध हुँदै आएको वाणगंगा- ४ को चारनम्बर सिद्धिपुर क्षेत्रमा शनिबार पनि दिनभर विद्युत अवरुद्ध भएको छ । विहान देखि अवरुद्ध भएको विद्युत आइतबार दिउँसोसम्म आउने सम्भावना रहेको विद्युत वितरण केन्द्र गजेहडाले जनाएको छ ।
जितपुर–तौलिहवा रोडमा रहेका विद्युतको पोल सार्नुपर्ने भएकोले विद्युत अवरुद्ध भएको वितरण केन्द्र गजेहडाले जनाएको छ । जितपुर–तौलिहवा सडकखण्डमा रहेका चारनम्बर सिद्धिपुर, गजेहडा, ओदारी, पचेहरा, जहदी लगायतका बजारमा एक्सेस रोड बन्ने क्रममा रहेकाले सडक नजिक रहेका विद्युत पोलहरु सार्ने काम भैरहेको छ ।
चारनम्बर बजार वरपरका विद्युतका पोल गत बर्ष नै दुई लेनको सडक बनाउदा सारिए पनि चारनम्बर चोक देखि झण्डै १ सय ५० मिटर दक्षिण देखि ठाकुरापुरसम्मका पोल सार्न बाँकी थियो । यी पोलहरु शनिबार सार्नुपर्ने भएकोले विद्युत अवरुद्ध भएको हो ।
शनिबार दिनभर काम सकाउने प्रयास भएपनि नसकिदा शनिबार रातभर विद्युत नआउने गजेहडा वितरण केन्द्रले जनाएको छ ।
गत हप्ता पनि यस क्षेत्रमा दुई दिन विद्युत अवरुद्ध हुन पुगेको थियो । विद्युतको ट्रान्सफर्मरमा आगलागी हुँदा दुई दिन विद्युत अवरुद्ध हुन पुगेको थियो ।
यो क्षेत्रमा विद्युत अवरुद्ध हुँदा रेडियो मायादेवी, मायादेवी अनलाइन डटकम लगायतका शैक्षिक संस्था, उद्योगधन्दा कलकारखाना, व्यापार व्यवसाय र सर्वसाधारण अन्धकारमा बस्न बाध्य छन ।
होली पर्व अगाडी नै विद्युतका पोल सार्ने अभियान थालिए पनि विवादले गर्दा आजसम्म रोकिन पुगेको थियो । बजारबासी र विद्युत प्राधिकरणको सहमती अनुसार शनिबार देखि काम थालिएको हो ।