राजपा अध्यक्ष मण्डलको संयोजकमा भण्डारी

काठमाडौँ ।
बुधबारबाट राष्ट्रिय जनता पार्टी नेपाल (राजपा)को अध्यक्ष मण्डलको संयोजकको जिम्मेवारी शरतसिंह भण्डारीले सम्हालेका छन् । भण्डारीले बुधबारबाट दोस्रो पटक संयोजकको जिम्मेवारी सम्हालेको महासचिव केशव झाले जानकारी दिए । यसअघि २०७५ चैत ५ देखि २०७६ जेठ ४ गतेसम्म संयोजकको जिम्मेवारी सम्हालेका थिए ।

राजपा विधानमा भएको २-२ महिनामा चक्रीय प्रणाली अनुरुप अध्यक्ष मण्डलको संयोजक परिवर्तन गर्ने व्यवस्था अनुरुप बुधबारबाट भण्डारीले संयोजकको जिम्मेवारी पाएका हुन् । भण्डारीको कार्यकाल आगामी जेठ ४ गतेसम्म हुनेछ । यसअघि माघ ५ गतेदेखि मंगलबारसम्म महेन्द्रराय यादव संयोजक थिए । २०७४ बैशाख ७ गते मधेसकेन्द्रित ६ दल मिलेर बनेको राजपामा एकीकरण पूर्वका ६ पार्टीका अध्यक्ष अध्यक्षमण्डलमा छन् ।