टी–२० विश्वकप स्थगित हुन्नः आईसीसी

एजेन्सी ।
अन्तर्राष्ट्रिय क्रिकेट काउन्सिल (आईसीसी) ले टी–ट्वान्टी विश्वकप क्रिकेट स्थगित नहुने बताएको छ ।

आईसीसीले मंगलबार विश्वकप तय भएकै समयमा हुने जनाएको हो । प्रतियोगिता अस्ट्रेलियाका विभिन्न सात स्टेडियममा अक्टोबर १८ देखि नोभेम्बर १५ सम्म सञ्चालन हुने छन् ।

“हामी पुरुष आईसीसी टी–ट्वान्टी विश्वकप तोकिएकै समयमा आयोजना गर्ने तयारीमा छौं,” आईसीसीले बताएको छ, “कोरोनाको प्रभावबारे स्थानिय आयोजक कमिटीले निगरानी गरिरहेको छ । उनीहरूका अनुसार हामी विश्वकप तोकिएकै समयमा गर्नेछौं ।”

कोरोना भाइसरका कारण विश्वका धेरै प्रतियोगिता स्थगित भइसकेका छन् । भर्खरै मात्र पाकिस्तान सुपर लिग (पीएसएल) स्थगित भएको छ । पीएसएलले कोरोना भाइरसको प्रभाव बढ्दै भएको भन्दै सेमिफाइनल र फाइनलका खेल अनिश्चितकालका लागि स्थगित गरेको हो ।