कपिलवस्तुमा आफ्नै छोराले गरे बुवाको हत्या

कपिलवस्तु ।
कपिलवस्तुमा एक पुरुषको हत्या भएको छ । जिल्लाको शिवराज नगरपालिकामा इँटाले हानेर छोराले आफ्नै बावुको हत्या गरेका हुन् । बावुको हत्या गरेको आरोपमा प्रहरीले एक युवकलाई पक्राउ गरेको छ । बावु चन्द्रबहादुर जिसीको हत्या आरोपमा शिवराज नगरपालिका–९ तुरुन्तपुरका ३२ वर्षे बसन्त जिसिलाई सोमबार साँझ प्रहरीले पक्राउ गरेको हो ।
घरायसी विवादका कारण छोराले इँटाले हानेपछि गम्भीर घाइते भएका चन्द्रबहादुरको चन्द्रदेव संजिवनी अस्पताल चन्द्रौटामा उपचारको क्रममा मृत्यु भएको हो । इलाका प्रहरी कार्यालय सुन्दरीडाँडाबाट खटिएको प्रहरीले बसन्तलाई पक्राउ गरेको हो । यस सम्बन्धमा थप अनुसन्धान भइरहेको प्रहरीले जनाएको छ ।