वार्यन शीर्ष स्थानमा कायमै, अग्सवर्ग २–० ले पराजित

एजेन्सी । साविक विजेता बायर्न म्युनिखले जर्मन बुन्डेस लिगामा चार अंकको अग्रता लिन सफल भएको छ । घरेलु मैदानमा अग्सवर्गलाई २–० ले पराजित गर्दै बायर्नले दोस्रो स्थानको बोरुसिया डर्टमन्डसँग ४ अंकको अग्रता लिन सफल भएको हो ।जितसँगै उपाधि यात्रालाई मजवुत बनाएको बायर्नको २५ खेलबाट ५५ अंक रहेको छ । समान खेलबाटै डर्टमन्डको ५१ अंक रहेको छ । पराजित अग्सवर्गको २७ अंकसहति १४औं स्थानमा छ । एलियन्ज एरिना म्युनिखमा आइतबार राति भएको खेलमा बायर्नको जितमा थोमस मुलर र लियोन गोरेट्जकाले गोल गरे दुवै गोल दोस्रो हाफमा सम्भव भएको थियो ।

खेलको शुरुवात देखि नै बल पोजेसनमा पकड बनाएपनि बायर्नले विपक्षी पोस्टमा गतिलो आक्रमण बुन्न सकेको थिएन । अग्सवर्गले पनि काउन्टर एट्याकमा केही अवसर गुमाएको थियो । ४३औं मिनेटमा सर्जी जिनाब्रीको क्रसमा थोमस मुलरको प्रहार क्रसबारमा लाग्दै बाहिरिदा बायर्नले पहिलो हाफमा अग्रता लिनबाट चुकेको थियो ।५३औं मिनेटमा जेरेमी बोएटिङको पासमा थोमस मुलरले गोल गर्दै बायर्नलाई अग्रता दिलाए । ६५औं मिनेटमा जोसुवा जिर्कजीको प्रहारले पोस्टको गति लिन सकेन । ६९औं मिनेटमा सर्जी जिनाव्रीको प्रहारलाई अग्सवर्गका गोलरक्षक एन्ड्रियस लुथेले उत्कृष्ट बचाउ गरे ।

७८औं मिनेटमा अल्फ्रेड फिनबोग्सनको पासमा फ्लोरेन नाइदरलेच्नरले गोल गर्ने सुन्दर मौका खेर फाल्दा अग्गवर्ग बराबरीबाट चुक्यो । ८७औं मिनेटमा नाइदरलेच्नरले गोल गरेपनि उनी अफसाइड ठहरिए । इन्ज्युरी समयको थप गरिएको पहिलो मिनेटमा सर्जियो जिनाव्रीको पासमा लियोन गोरेट्जकाले गोल गर्दै बायर्नलाई २–० को जित दिलाए ।