टिप्परले मोटरसाइकललाई ठक्कर दिदा पाल्पामा श्रीमतीको मृत्यु, श्रीमान गम्भीर घाइते

पाल्पा ।
टिप्परले मोटरसाइकललाई ठक्कर दिदा पाल्पामा एक जनाको मृत्यु भएको छ भने एक जना गम्भीर घाइते भएका छन् ।
जिल्लाको तानसेन ७, लामीडाँडामा टिप्परले मोटरसाइकललाई ठक्कर दिँदा मोटरसाइकलको पछाडि सिटमा बसेकी तानसेन ७ की ५५ वर्षीया मधु श्रेष्ठको ज्यान गएको हो । मोटरसाइकल चलाइरहेका मधुका श्रीमान ६२ वर्षीय हिमालप्रसाद श्रेष्ठ गम्भीर घाइते हुनुभएको छ । उहाँको लुम्बिनी मेडिकल कलेज, प्रभासमा उपचार भैरहेको छ ।
जिल्ला प्रहरी कार्यालय, पाल्पाका अनुसार तानसेनबाट बुटवल जाँदै गरेको लु ७ प ४३४ नम्बरको मोटरसाइकललाई त्यसै दिशातर्फ जाँदै गरेको लु २ ख ३१७८ नम्बरको टिप्परले ठक्कर दिएको हो ।
ठक्कर दिने टिप्पर र चालकलाई नियन्त्रणमा लिएर घटनाको बारेमा अनुसन्धान भइरहेको प्रहरीले जनाएको छ ।