काठमाडौं ।
निवर्तमान संचारमन्त्री गोकुल बाँस्कोटाले गाली बेइज्जती मुद्दा दर्ता गरेका छन्। आफूविरुद्ध झुट्टा लाञ्छना लगाएको भन्दै उनले जिल्ला अदालत काठमाडौंमा मुद्दा दर्ता गराएका हुन्। उनले शुक्रबार दिउँसो आफ्ना प्रतिनिधिमार्फत जिल्ला अदालत काठमाडौंमा न्याय माग्दै मुद्दा दायर गरेको जानकारी दिएका छन्।
उनले सामाजिक सञ्जाल ट्विटरमार्फत मुद्दा दायर गरेको बताएका हुन्। म विरुद्ध लगाइएको झुट्टा लाञ्छना र गाली बेइज्ज्तीको विरूद्धमा मैले आज आफ्ना प्रतिनिधिमार्फत जिल्ला अदालत, काठमाडौंमा न्याय माग गदै मुद्दा दायर गरेको जानकारी सबैमा गराउँदछुु उनले भनेका छन्।
उनले कसविरुद्ध के माग गरी मुद्दा दायर गरिएको हो भन्ने खुलाएका छैनन्। करिब २७ अर्ब रुपैयाँको सेक्युरिटी प्रिन्टर खरिदका लागि ५५ करोड रुपैयाँ कमिसन मागेको अडियो सार्वजनिक भएपछि सञ्चार तथा सूचना प्रविधि मन्त्री पदबाट बाँस्कोटाले गत बिहीबार नैतिकताको आधार जनाएर राजीनामा दिएका थिए। स्वीस कम्पनीका एजेण्ट भनिने विजयप्रकाश मिश्रले सेक्युरिटी प्रिन्टर खरिदका क्रममा आउने ७४ करोड कमिसनमा ५५ करोड बाँस्कोटाले मागेको भन्दै अडियो सार्वजनिक गरेका थिए। गत बुधबार बेलुका उक्त विवादित अडियो सार्वजनिक भएपछि सरकारका प्रवक्तासमेत रहेका मन्त्री बाँस्कोटाले नेकपाका अध्यक्षद्वय केपी शर्मा ओली र पुष्पकमल दाहाल प्रचण्डको निर्देशनमा राजीनामा दिएका थिए ।
प्रतिक्रिया