एकै पटक दुईटा झोलुङ्गेपुल बनेपछि स्थानीयलाई सहज

चन्द्रौटा ।
कपिलवस्तुको शिवराज नगरपालिका–३ मा एकै पटक दुई वटा झोलुङ्गे पुल बनेपछि स्थानीय खुसी भएका छन् । स्थानीयवासीलाई आवतजावतमा सहज भएको छ । पूर्वपश्चिम राजमार्गबाट करिब तीन किलोमिटर उत्तरतर्फको भितिरिया गाउँमा स्थानीयलाई अहिले आवतजावत सहज बनेको छ ।
गाउँमा पुग्न तीन वटा खोला तर्नुपर्ने भए पनि अहिले तिनै वटा खोलामा पुल निर्माण भएपछि स्थानीयको जोखिम हटेको छ । जवाई खोलामा पक्की पुल, मैनार खोला र सुकबेल खोलामा झोलुङ्गे पुल बनेको छ ।
पानी परेको बेला बजार जान र विद्यार्थीलाई पठनपाठन गर्न समस्या भएको थियो । करिब ८० घरधुरी रहेको भितरिया गाउँमा पुल बनेपछि अहिले स्थानीय पुलबाटै आवतजावत गर्ने गरेका छन् ।
साथै भितरिया गाउँसँगै जोडिएको कपिलवस्तुकै पर्यटकीयस्थल सोनवागढ पुग्न सुकबेल खोला तर्नु पर्दछ । खोलामा पनि मैनार खोलाको पुलसँगै उक्त खोलामा पनि झोलुङ्गे निर्माण भएको छ । जुन ७३ मिटर लम्बाइ र ५६ लाखको लागतमा निर्माण भएको बताइएको छ ।
नेपाल सरकारले तुइन हटाउने योजना देशैभर सञ्चालन गरेको अभियान स्वरुप कपिलवस्तुका विभिन्न स्थानमा झोलुङ्गेपुल निमार्ण भइरहेको छ । लिडो र सेवक नामक संस्थाको प्रविधिक सहयोगमा ४९ लाख को लागतमा निमार्ण भएको निमार्ण उपभोक्ता समितिका अध्यक्ष कपिलदेव खनालले बताए ।
पुल नहुँदा विद्यार्थीलाई विद्यालय पुग्न र बिरामीलाई स्वास्थ्य संस्था पुग्न समस्या भएको थियो । वर्षातको समयमा करिब एक महिनासम्म विद्यार्थी विद्यालय जान नसक्ने अवस्था रहेको स्थानीय भितरिया गाउँका अध्यक्ष रामबहादुर थारुले बताए ।
भितरिया गाउँ पुरानो गाउँ भए पनि विकासमा पछाडि रहेकाले वडाले भितरियालाई प्राथमिकतामा राखेको वडाध्यक्ष टेकलाल सापकोटाले बताए ।
वडामा चार वटा पुल निर्माण भएकाले पछाडि परेका गाउँहरु पनि अब बजारसँग जोडिएको उनले बताए । ऐतिहासिक क्षेत्र सोनवागढ जानको लागि सडक समस्या रहेकाले पुल निर्माण भएपछि त्यँहा पुग्न सहज हुने विश्वास उनले व्यक्त गरे ।
शिवराज नगरपालिकाका नगरप्रमुख नेत्रराज अधिकारीले नगरभित्रका सबै गाउँसम्म जोड्न पुलको व्यवस्था हुने बताए । अब कसैले पनि नदी तथा खोलाको कारणले गन्तव्यसम्म पुग्न नसक्ने पिडा सहन नपर्ने अधिकारीको भनाइ छ । (रासस)