एजेन्सी ।
बार्सिलोनासँगको अंक दूरी तीन नै कायम गर्ने मौका रियल मड्रिडले गुमाएको छ । स्पेनिस ला लिगा फुटबल अन्तर्गत आइतबार राति भएको खेलमा लिग लिडर रियल मड्रिड सेल्टा डी भिगोसँग २–२ को बराबरीमा रोकिएको हो ।
घरेलु मैदानमा भएको खेलमा रियल मड्रिड पहिलो हाफमा १–० ले पछि परेको थियो। सातौँ मिनेटमा स्मोलोभले गोल गर्दै सेल्टा डी भिगोलाई सुरुवाति अग्रता दिलाएका हुन् । ५२ औँ मिनेटमा टोनी क्रसले रियल मड्रिडका लागि बराबरी गोल फर्काए ।
६५ औँ मिनेटमा पाएको पेनाल्टीमा सर्जियो रामोसले गोल गर्दै टिमलाई अग्रता दिलाएका थिए । तर ८५ औँ मिनेटमा सेल्टा डी भिगोका लागि मिना लोरेन्जोले बराबरी गोल गरेर रियल मड्रिडबाट एक अंक खोसेका हुन् ।
बराबरीपछि शीर्षस्थानको रियल मड्रिडको २४ खेलबाट ५३ अंक भएको छ । दोस्रो स्थानको बार्सिलोनाको समान २४ खेलबाट ५२ अंक रहेको छ । २१ अंक जोडेको सेल्टा रेलिगेशन जोनबाट माथि उठेको छ ।
ला लिगा अन्तर्गत आइतबार राति भएका अरु खेलमा ओसासुनाले एथ्लेटिको बिल्बाओलाई १–० ले हरायो भने लेगानेस र रियल बेटिसले गोलरहित बराबरी तथा सेभिल्ला र स्पानियोलले २–२ को बराबरी खेल्दै अंक बाँडेका छन् ।
प्रतिक्रिया