सांसद अभिषेक माथि ज्यान मार्ने उद्योग सम्बन्धि मुद्धाः ५ लाख धरौटी बुझाएर पुर्पक्ष

मायादेवी अनलाइन, चारनम्बर ।
प्रतिनिधि सभा सदस्य अभिषेक प्रताप शाह अन्ततः अदालतमा उपस्थित भएर ५ लाख धरौटी बुझाएका छन् । जिल्ला अदालत कपिलवस्तुमा शरिर बन्धक, डाँका, अपहरण तथा ज्यान मार्ने उद्योग अन्र्तगत मुद्धा खेपेका सांसद शाहले ५ लाख धरौटी बुझाएका हुन् । उनले आफुमाथि लागेको आरोप अस्विकार गर्दै आएका थिए ।
जिल्ला न्यायधिश लालकाजी श्रेष्ठको एकल इजलाशले शाहलाई तत्काल प्राप्त प्रमाणबाट कसुरदार देखिएको भन्दै मुलुकी फौजदारी कार्यविधि संहिता २०७४ को दफा ६८ बमोजिम ५ लाख धरौटी लिई मुद्धाको पुर्पक्षका लागि आदेश दिएको बताइएको छ ।
राप्रपा (संयुक्त)का केन्द्रिय सदस्य श्याम मिश्रामाथि सांसद शाहले घरमा बोलाएर सांघातिक आक्रमण गरेर घाइते बनाएका थिए ।
गत पुस ५ गते मिश्रामाथि आक्रमण गरेर भारत भागेका शाहलाई पक्राउ गर्न माग गर्दै पिडितले जिल्ला प्रहरी कार्यालय कपिलवस्तुमा जाहेरी दिएका थिए । पीडितको जाहेरी पश्चात प्रहरीले घटनामा संलग्न सांसद शाह विरुद्ध पक्राउ पुर्जी जारी गरेको थियो ।
पक्राउ पूर्जी जारी भएलगत्तै शाह भारतको लखनउमा थिए । तर, उनलाई प्रहरीले पक्राउ गर्न सकेको थिएन । मुद्धाको फैसला हुने दिन सोमबार अदालतमा उपस्थित भएका उनी ५ लाख धरौटी बुझाएर पुर्पक्षका लागि रिहा भएका हुन् ।
अदालतले सांसद शाहका सवारी चालक शशी कहाँरमाथि पनि ५ लाख धरौटी माग गरेको छ । घटनामा चालक शाहले पनि सघाएको आरोप थियो । लामो समय मधेस केन्द्रित दलबाट राजनीतिक गरेर सांसद शाह चुनाव ताका कांग्रेसमा प्रवेश गरी कपिलवस्तु निर्वाचन क्षेत्र नं. ३ बाट चुनाव जितेका थिए ।