रियल मड्रिड शीर्ष स्थानमा, बार्सिलोना तीन अंकले पछि

काठमाण्डौं ।
रियल मड्रिडले स्पेनिस ला लिगा फुटबलमा शीर्ष स्थान कायम राखेको छ । लिग अन्तर्गत आइतबार राति भएको खेलमा रियल मड्रिडले ओसासुनालाई ४–१ ले पराजित गरेको हो ।
अवे मैदानमा भएको खेलमा रियल मड्रिडका लागि इस्को, सर्जिओ रामोस, लुकास भाज्क्वेज र जोभिकले गोल गरे । गार्सियाले ओसासुनाका लागि एक गोल फर्काएका हुन् ।
१४ औँ मिनेटमा गार्सियाको गोलबाट घरेलु टोली ओसासुनाले सुरुवाति अग्रता लियो । ३३ औँ मिनेटमा इस्कोले रियल मड्रिडका लागि बराबरी गोल फर्काए । ३८ औँ मिनेटमा रामोसले गोल गरेपछि पहिलो हाफमा जिनेदिन जिदानको टिमले २–१ को अग्रता लियो ।
भाज्क्वेजले ८४ औँ तथा जोभिकले इन्जुरी समयको दोस्रो मिनेटमा गोल गरेपछि रियल मड्रिड ४–१ ले विजयी भयो।
जितपछि शीर्ष स्थानको रियल मड्रिडको २३ खेलबाट ५२ अंक भएको छ । उ दोस्रो स्थानको बार्सिलोना भन्दा तीन अंकले अघि रहेको छ । १२ औँ स्थानमा रहेको ओसासुनाको २३ खेलबाट २८ अंक भएको छ ।