बर्दियामा कार–मोटरसाइकल ठोक्किए, एक जनाको मृत्यु

बर्दिया ।
बर्दियाको बाँसगढीमा कारले मोटरसाइकललाई ठक्कर दिँदा एक जनाको ज्यान गएको छ । बाँसगढी नगरपालिका ९ माछागढ चिसापानीनजिकै पूर्व पश्चिम राजमार्गअन्तर्गत पूर्वबाट पश्चिमतर्फ गइरहेको कारले मोटरसाइकललाई ठक्कर दिँदा एक जनाको ज्यान गएको हो । ज्यान जानेमा मोसरसाइकलमा सवार बर्दियाको बारबर्दिया नगरपालिका १० की अन्दाजी ३०/३१ वर्षीय रामकृष्णी थारु रहेको प्रहरीले जनाएको छ ।
मोटरसाइकल चालक सोही ठाउँको अन्दाजी २८/२९ वर्षीय दुखराम थारु भने घाइते भएका छन् । शनिबार बिहान पूर्व पश्चिम राजमार्गअन्तर्गत पूर्वबाट पश्चिमतर्फ गइरहेको बा ९ च ९२९१ नम्बरको कारले सोही दिशामा गइरहेको भे ९ प ७८१० नम्बरको मोटरसाइकललाई पछाडिबाट ठक्कर दिएको थियो ।
दुर्घटनामा घाइते भएका थारुको कोहोलपुर मेडिकल कलेजमा उपचार भइरहेको इलाका प्रहरी कार्यालय बाँसगढीका प्रहरी निरीक्षक इन्द्रजित सुनारले जानकारी दिए । कार चालक पर्वतको मोदी गाउँपालिकाका सुनिल गुरुङ र कार प्रहरीको नियन्त्रणमा रहेको उनले बताए ।