सरस्वतीविरुद्ध थ्री स्टारको सानदार जित, संजोग बने नायक

काठमाडौं ।
जारी सहिद स्मारक ‘ए’ डिभिजन लिगअन्तर्गत आज (शनिबार) थ्री स्टार क्लबले सानदार जित निकालेको छ ।
त्रिपुरेश्वरस्थित दशरथ रंगशालामा उसले रेलिगेसन जोनमा रहेको सरस्वती युथ क्लबविरुद्ध ४–० को जित निकालेको हो । थ्री स्टारको जितमा संजोग राईले ह्याट्रिक गरे, जुन २०७० सालयताको पहिलो हो ।
संजोगले खेलको ५७ औं, ६० औं र ७१ औं मिनेटमा गोल गरे। त्यसअघि खेलको ४८ मिनेटमा थ्रीस्टारका तर्फबाट लाल रम्भाराले गोल गर्दै क्लबलाई सुरुवाती अग्रता दिलाएका थिए ।
जितसँगै थ्रीस्टार क्लब १० खेलबाट १७ अंक जोड्दै अंक तालिकाको चौथो स्थानमा उक्लिएको छ । उसले पाँच खेलमा जित र दुईमा बराबरी खेलेको छ ।
अंक तालिकाका पहिलो, दोस्रो र तेस्रो स्थानमा क्रमशः त्रिभुवन आर्मी, मछिन्द्र र मनाङ मर्स्याङ्दी क्लब छन् ।