स्पेनिस कोपा डेल रेः बार्सिलोनाको सकसपूर्ण जित

एजेन्सी ।
स्पेनिस कोपा डेल रे फुटबलमा कीर्तिमानी उपाधि यात्रा तय गरेको बार्सिलोनाले यो सिजनको अन्तिम ३२ अन्तर्गतको खेलमा सकसपूर्ण जित दर्ता गरेको छ ।

बुधबार राति भएको खेलमा ला लिगा क्लब बार्सिलोनाले तेस्रो डिभिजनको क्लब इबिजामाथि २–१ को जित निकालेको हो । घरेलु टोली इबिजाले नवौँ मिनेटमा नै काबालेको गोलबाट अग्रता लिएको थियो ।

पछि परेको बार्सिलोनाका लागि दोस्रो हाफको अन्तिम समयतिर एन्टोनी ग्रिजम्यानले दुई गोल गरे । ७२ औँ मिनेटमा ग्रिजम्यानले बार्सिलोनाका लागि बराबरी गोल फर्काए । इन्जुरी समयको चौथो मिनेटमा उनले गोल गरेर बार्सिलोनालाई जित दिलाएका हुन् ।

यो खेलमा बार्सिलोनाले लियोनल मेस्सी तथा जेरार्ड पिकेलाई आरम दिएको थियो । बार्सिलोनाले कोपा डेल रेको उपाधि कीर्तिमानी ३० पटक जितेको छ ।