रोनाल्डोको लगातार गोल, युभेन्टस सेमिफाइनलमा

एजेन्सी ।
क्रिष्टियानो रोनाल्डोले लगातार गोल गर्ने क्रम जारी राखेका छन् । रोनाल्डोको गोलको सहयोगमा युभेन्टसले इटालियन कोका इटालिया अन्तर्गत बुधबार राति भएको खेलमा जित निकालेको छ ।

घरेलु मैदानमा भएको खेलमा रोमालाई ३–१ ले पराजित गर्दै युभेन्टस कोपा इटालियाको सेमिफाइनलमा प्रवेश गरेको छ । २६ औँ मिनेटमा रोनाल्डोले गोल गर्दै युभेन्टसलाई सुरुवाति अग्रता दिलाए । रोनाल्डोले पछिल्ला १० खेलमा १३ गोल गरेका छन् । उनले यो सिजन क्लब र राष्ट्रिय टिमबाट गरी ३१ खेलमा ३० गोल गरिसकेका छन् ।

युभेन्टसका लागि ३८ औँ मिनेटमा रोड्रिगो बेन्ताकुरले गोल गरे । यस्तै पहिलो हाफको इन्जुरी समयको दोस्रो मिनेटमा लियोनाडोए बानुकीले गोल गरे ।

पहिलो हाफमै ३–० को अग्रता लिएको युभेन्टसले दोस्रो हाफमा रोमाका लागि गोल गरिदियो । रोमाका सेन्गिज अण्डरको प्रहार जोगाउने क्रममा युभेन्टसका गोलरक्षक जियानलुइजी बुफोनले आत्मघाती गोल गरेका हुन् । युभेन्टसले सेमिफाइनलमा एसी मिलान वा तोरिनोको सामना गर्ने छ ।