काठमाण्डौ ।
शहीद स्मारक ए डिभिजन लिग फुटबलमा शनिबार तेस्रो चरणको खेल सकिदैँछ । तेस्रो चरणको अन्तिम खेल बाँकी रहँदा मनाङ मर्स्याङ्दी क्लब लगातार तीन खेलमा जित दर्ता गर्दै ९ अंकका साथ शीर्ष स्थानमा छ भने सबै खेलमा पराजित भएको सरस्वती युथ क्लबले तालिकामा अंकको खाता नै खोल्न सकेको छैन ।
ए डिभिजन लिग अन्तर्गत शनिबार ललितपुरे क्लब थ्रीस्टार र विभागीय क्लब एपीएफ आमने सामने हुने छन् । थ्री स्टार एपीएफविरुद्ध जित निकाल्दै अपराजित रहने दाउमा हुने छ । थ्रीस्टार शनिबार विजयी भए तालिकाको दोस्रो स्थानमा पुग्ने छ भने बराबरीले एक स्थान मात्रै फाइदा हुने छ ।
थ्रीस्टार अहिले छैटौं स्थानमा रहेको छ । उता विभागीय क्लब एपीएफ भने पहिलो जितको खोजीमा हुने छ । अहिलेसम्म एक खेलमा बराबरी मात्रै गर्न सकेको एपीएफ थ्रीस्टारलाई स्तव्ध पार्दै तीन अंक लिने प्रयासमा हुने छ । एपीएफ विजयी भए दशौँ स्थानमा उक्लने छ । एपीएफ अहिले १२ औँ स्थानमा छ । थ्रीस्टार र एपीएफबीचको खेल दशरथ रंगशालामा दिउँसो तीन बजे हुने छ ।
प्रतिक्रिया