‘ए’ डिभिजन लिगमा आज २ वटा खेल हुँदै

शहीद स्मारक ‘ए’ डिभिजन लिग फुटबलमा शुक्रबारदेखि दोस्रो चरणको खेल सुरु हुँदै छ । पहिलो चरणको समाप्तिसँगै एक दिन विश्रामपछि आजदेखि दोस्रो चरणको खेल सुरु हुन लागेको हो ।

दोस्रो चरणको पहिलो दिन २ वटा खेल हुँदैछन् । मध्याह्न १२ बजे एन्फा मैदान सातदोबाटोमा मच्छिन्द्र क्लब र च्यासल युथ क्लबबीच प्रतिस्पर्धा हुँदैछ ।

मच्छिन्द्रले पहिलो खेलमा बिग्रड ब्वाइजमाथि जित निकालेको थियो । तर गत वर्षकै अंक तिर्न बाँकी रहेकाले तालिकामा मच्छिन्द्रको २ अंक छ ।

मच्छिन्द्रमा गत सिजनमा मनाङ मर्स्याङ्दीलाई लिग च्याम्पियन बनाउँदाका खेलाडीहरुको बाहुल्यता रहेको छ । मच्छिन्द्र र च्यासल दुवै टिम जित निकाल्ने लक्ष्यका साथ मैदान उत्रने छन् । मच्छिन्द्र विराज महर्जनको कप्तानीमा खेल्दै छ भने च्यासल सन्तोष साहुखलको कप्तानीमा छ ।  त्यस्तै दिउँसो ३ बजे दशरथ रंगशालामा हुने दोस्रो खेलमा ब्रिगेड ब्वाइज र फ्रेण्ड्स क्लब प्रतिस्पर्धा गर्दैछन् । दुवै टिमले पहिलो चरणमा पराजय भोगेकाले आज स्पष्ट जितका साथ तीन अंक जोड्ने प्रयासमा हुने छन् ।