कपिलवस्तु महोत्सवमा आज प्रकाशले रुवाउने, आस्थाले नचाउने

मायादेवी अनलाइन, कपिलवस्तु ।
बुद्ध रंगशाला जितपुरमा जारी एघारौँ कपिलवस्तु महोत्सवमा आज पनि राष्ट्रिय कलाकारको प्रस्तुति रहने भएको छ । आज ११ औँ दिनमा चर्चित पप गायिका आस्था राउत, लोक दोहोरी गायक प्रकाश सपुत र शान्ता परियारको मुख्य प्रस्तुति रहने सांस्कृतिक संयोजक राजन आलेले जानकारी दिनुभयो । महोत्सव सकिने अब एक दिन मात्र बाँकी रहेकाले सबैलाई उपस्थित हुन आयोजकले आग्रह गरेका छन् ।
यस्तै महोत्सवको मुख्य आकर्षणको रुपमा रहेको नवौँ डान्स आइडलमा आज उत्कृष्ट ५ जनाको प्रस्तुति रहने आयोजकले जनाएका छन् । आइडलको घोषणा पौष १ गते राति ८ बजे हुने छ । महोत्सवको अन्तिम दिन नजिक आउँदा दैनिक उपभोग्य सामान खरिद गर्नेको पनि उत्तिकै भीँड लागेको छ । यस्तै कृषि तथा औद्दोगिक प्रर्दशनीमा पनि दर्शक घुँइचो छ । महोत्सव अवधिभर दैनिक उपभोग्य सामाग्रीको खरिदमा विशेष छुट रहेकाले पनि किनमेल गर्नेको भीँड लागेको हो । युवा क्षमतामा वृद्धि, कृषि र पर्यटनमा समृद्धि भन्ने मूल नाराका साथ गत मंसिर १९ गतेबाट महोत्सव सुरु भएको थियो । महोत्सवमा १ लाख दर्शकले अवलोकन गर्ने र ५ करोड बराबरको आर्थिक कारोबार हुने लक्ष्य राखिएकोमा लगभग त्यो लक्ष्य पुरा हुने अवस्थामा आफूहरु आएको संयोजक राजकुमार खाँणले जानकारी बताउनु भयो ।