एजेन्सी । उपाधि होडमा इन्टर मिलानसँग यो सिजन निकै प्रतिस्पर्धात्मक अवस्थामा रहेको युभेन्टसले महत्वपूर्ण जित दर्ता गरेको छ ।इटालियन सिरी ए फुटबल अन्तर्गत आइतबार राति भएको खेलमा युभेन्टसले युडिनेसलाई ३–१ ले पराजित गरेको हो ।घरेलु मैदानमा भएको खेलमा युभेन्टसलाई जिताउन क्रिष्टियानो रोनाल्डोले दुई गोल गरे । यस्तै लियोनार्डो बोनुचीले एक गोल गरेका हुन् । युडिनेसका लागि इग्नासिओ पुसेतोले एक गोल फर्काए ।
नवौँ मिनेटमा रोनाल्डोको गोलबाट युभेन्टसले सुरुवाति अग्रता लियो । ३७ औँ मिनेटमा रोनाल्डोले व्यक्तिगत दोस्रो गोल गर्दै टिमको अग्रता दोब्बर पारे ।बोनुचीले ४५ औँ मिनेटमा गोल गरेपछि युभेन्टसले पहिलो हाफमा नै ३–० को अग्रता लिएको हो । दोस्रो हाफमा युभेन्टसले थप गोल गर्न सकेन । तर इन्जुरी समयको चौथो मिनेटमा पुसेतोले युडिनेशका लागि एक गोल फर्काएका हुन् ।
पुसेतोको गोल अघि रोनाल्डोले ह्याट्रिक गर्ने अवसर सिर्जना गरेका थिए । तर उनले गरेको प्रहार गोलमा परिणत हुन सकेन । रोनाल्डोले सिरी ए मा ह्याट्रिक गर्न सकेका छैनन् ।जितपछि केही समय शीर्ष स्थान र त्यसपछि पुनः दोस्रो स्थानमा आएको युभेन्टसको १६ खेलबाट ३९ अंक भएको छ। आइतबार राति नै भएको खेलमा फियोरेन्टिनासँग १–१ को बराबरी खेलेको इन्टर मिलानको पनि ३९ अंक नै छ तर गोल अन्तरका आधारमा उ शीर्ष स्थानमा पुनः कायम हुन सकेको हो ।
प्रतिक्रिया