नेपाली सैनिक सवार बस कावासोतीमा पल्टियो

कावासोती ।

पूर्वपश्चिम राजमार्गअन्तर्गत कावासोती नगरपालिका–३ स्थित राजमार्गमा नेपाली सेना सवार बस दुर्घटना भएको छ । सुर्खेत पृतनादेखि काठमाडौँ छाउनीका लागि छुटेको  ना ६ ख ४०४ नं को  बस आज बिहान दुर्घटना हुँदा नेपाली सेना ३० जना घाइते भएका हुन् ।

बस अनियन्त्रित भई राजमार्गदेखि १० मिटर तल खसेको र घाइतेमध्ये केहीको अवस्था गम्भीर रहेको जिल्ला प्रहरी कार्यालय नवलपरासीपूर्व नवलपुरका प्रहरी निरीक्षक अर्जुन अधिकारीले जानकारी दिए ।

दुर्घटनामा परी घाइते भएका १८ जनाको कावासोतीस्थित नवलपुर अस्पताल र १२ जनाको मध्यविन्दु जिल्ला अस्पतालमा उपचार भइरहेको प्रहरी निरीक्षक अधिकारीले जानकारी दिए । बसमा ४० नेपाली सेना थिए । दश जनालाई भने केही नभएको प्रहरीले जनाएको छ ।