डिस्कोले खोस्यो विमलको फुटवल करिअर, ए डिभिजन लिग पनि खेल्न नपाउने

काठमाडौँ । चर्चित फुटबलर विमल घर्तीमगरसहित चार खेलाडीले शहिद स्मारक ‘ए’ डिभिजन लिग पनि खेल्न नपाउने भएका छन् । भुटानमा कुवेतसँग विश्वकप छनोट खेल खेल्न जानुअघि डान्सबार र डिस्को गएर अनुशासनको कारवाहीमा परेका उनीहरुले अब ए डिभिजन लिग खेल् नपाउने भएका हुन् ।
अखिल नेपाल फुटबल संघ (एन्फा) का अध्यक्ष कर्मा्छिरिङ शेर्पाले खेलाडीमाथि छानबिन भइरहेकोले तत्काल कुनैपनि प्रतियोगिता खेल्न नपाउने बताए । एन्फाले लिगमा हुने खेल मिलेमतो र अनुशासनहिनता जस्ता गतिविधिलाई रोक्न छुट्टै संयन्त्र बनाउन लागेको पनि शेर्पाले बताए । साढे ६ करोड लगानीको महत्वकाङ्क्षी ‘ए’ डिभिजन लिग फुटबल भोलीदेखिदेखि दशरथ रंगशालामा सुरु हुँदैछ ।
विश्वकप छनोट र १३ औँ दक्षिण एसियाली खेलकुद (साग) को बन्द प्रशिक्षणमा रहेका विमलसहित अन्जन बिष्ट, सन्तोष तामाङ र दिनेश राजवंशी राति क्याम्पबाट भागेर ठमेल र दरबारमार्गका विभिन्न डान्सबार र डिस्को पुगेका थिए ।
डान्सबार गएर झगडा गरेको खुलेपछि यी खेलाडीलाई एन्फाले तत्काल बर्खास्त गरेको थियो । विश्वकप छनोटसँगै साग फुटबल खेल्न नपाएका यी खेलाडीले लिगपनि गुमाउने भएका छन् । यी खेलाडीबिनै नेपालले भर्खर फाइनलमा भुटानलाई २–१ गोलले हराएर साग फुटबलको स्वर्ण जितेको थियो । नेपालले लिग चरणदेखि अपराजित रहँदै उपाधि जितेको हो ।